Réttað var fimmtudaginn 24. september og voru heimtur góðar þrátt fyrir að féið vildi ekkert sérstaklega koma til byggða en það sótti nokkuð stíft upp í hlíðarnar. Okkur vantar aðeins eina tvílembda kind og vonandi kemur hún fram í seinni leit. Lömbin og kindurnar litu bara nokkuð vel út og létum við aðeins 16 lömb og 4 ær á sláturbílinn en rest var keyrð heim til að skoða betur og brennimerktum við allar hyrndar ær þegar heim var komið svo auðveldara væri að finna féið sem vant er að ganga innfrá.

Hin árlega litasýning var haldin í dag í Árbæjarhjáleigu, veitt voru verðlaun eins og áður fyrir þrjú efstu sætin í lambhrútum, gimbrum, ær með afkvæmi, hrútur með afkvæmi og svo athyglisverðasta litinn. Í ár hlaut Maja í Skinnhúfu fyrsta sætið fyrir athyglisverðasta litinn en það var morarnhöfðóttur forystuhrútur sem hún kom með. Við fórum ekki með neitt fé í ár en það réðst af skipulagsleysi og verður gert betur næsta ár.

Fjölskyldan fór sína árlegu ferð í Veiðivötn og dvöldu í húsunum Holt og Land eins og áður, veiddust aðeins 3 fiskar á stöng svo ekki var nú merkileg veiðin að þessu sinni en ágætis veður og alltaf gaman að fara þangað. Annar bíllinn bilaði smávægilega en allir komust þó heilir til byggða. Þá var skellt sér í lónið hérna heima og veiddir fjórir á innan við klukkutíma svo það bætti heldur betur upp veiðina þessa helgi. Tóta og Siggi skelltu sér svo til Stokkhólmar helgina eftir og fengu frábært veður, falleg borg og lúxus hótel í hjarta borgarinnar en þetta er í fyrsta skiptið sem þau heimsækja Stokkhólm og munu eflaust fara þangað aftur síðar. 

Núna eru öll folöldin fædd þetta árið og öll hafa þau hlotið nöfn sem eru eftirfarandi Nói, Neisti, Náttfari, Níl, Nútíð, Næla, Nanna og Nóta. Þetta eru þau folöld sem eru í eigu fjölskyldunnar, fleiri folöld fæddust á bænum sem annað hvort eru seld eða í eigu annarra. Sigurrós er komin heim sónuð með 35 daga gömlu fyli við Storm frá Herríðarhóli og var hún sótt í gær um leið og Viðju var skutlað undir hest en Stekkur frá Skák varð fyrir valinu þetta árið. Hann fór í flottan dóm í sumar og okkur þótti hann góður kostur fyrir hryssuna.

Þetta árið var farið með helmingi færra fé inn á afrétt en undanfarin ár, vorið fór seint af stað og allur gróður seinni til og því þótti það heppilegt í þetta sinn að keyra færri inn eftir. Helgin fór því í fjárrag ásamt öðru, Siggi og Gulli fluttu sláturfisk heim til að auðvelda sláturdagana og Nína beinhreinsaði fisk sem fer í reyk eftir helgi. Svo var grafið fyrir gróðurhúsi sem rís innan skamms í garðinum og þá verður sáð fyrir öllum sumarblómum og hægt að smella viðkvæmustu blómunum inn á veturna. Þar græddu Tóta og Siggi nokkur tré sem þurftu að víkja fyrir gróðurhúsinu og voru flutt heim að Hrauntá. Tóta sýndi Æsu á hundasýningu þessa sömu helgi og fékk aðra einkunn fyrri daginn og fyrstu einkunn seinni daginn, ágætis umsögn og stóð Æsa sig bara nokkuð vel í stórborginni innan um alla fínu hundana.