Salka frá Lækjarbotnum hlaut 8,11 í aðaleinkunn í kynbótadómi og þar með fyrstu verðlaun, hún hlaut 8,29 fyrir hæfileika og 7,83 fyrir byggingu. Hún var seld til Danmerkur fyrir stuttu og mun vonandi standa sig vel í nýju landi hjá nýju eigendum og óskum við þeim til hamingju með þessa flottu hryssu. 

Við tókum svo út Þulu og Ösku og var ákveðið að bíða fram á næsta vor með sýningu á þeim, báðar hafa þær gott af því að þroskast og fá því gott frí í sumar, þær eru fjögurra og fimm vetra og var byrjað á þeim báðum í vetur sem leið.

Tvö folöld eru fædd, rauður hestur undan Oddrúnu frá Lækjarbotnum og Barða frá Laugarbökkum, svo skjótt hryssa undan Hófí frá Litla-Garði og Hákon frá Ragnheiðarstöðum. Nú fara spennandi tímar í gang og miklar vonir oft bundnar við þessi kríli sem fæðast, næst í röðinni er líklega Sigurrós sem er fylfull við Glóðafeyki frá Halakoti.

Sauðburður er hafinn, helmingurinn af gemsunum borinn og sæðingin farin að detta í gang. Fyrsta ærin sem bar kom með fjögur lömb, 3 hrúta og 1 gimbur. Hún hefur verið einstaklega frjósöm þessi ær, tvílembd gemlingsárið, þrílembd næstu tvö ár og núna fjórlembd.

Reiðhestarnir eru komnir í svokallað sauðburðarfrí en þá er enginn tími til að skreppa á bak og þeir fá mánaðarfrí frá okkur á meðan, þeim leiðist það varla og hafa það notalegt. Þórunn er búinn með fyrsta veturinn sinn í Reiðmanninum og gekk vel, bæði hún og hesturinn ánægð með góða kennslu hjá henni Þórdísi Erlu.

Salka frá Lækjarbotnum var svo að keppa um helgina í sinni fyrstu keppni og gekk líka svona vel, vann fimmganginn með 6,60 í einkunn, knapi var Jóhann Ragnarsson sem hefur tamið og þjálfað Sölku.

Það hefur verið fósturtalið í gemsunum síðustu ár hjá okkur en í ár var ákveðið að láta telja í öllu fénu og sjá hvort það hjálpi okkur í vor í sauðburðinum að vita fyrir víst hvað von er á mörgum lömbum úr hverri á. Núna fer að styttast í sauðburð en von er á fyrstu lömbunum um mánaðamótin en við fengum smá forskot á sæluna því geiturnar sem við höfum í pössun eru farnar að bera og eru komin 3 kið og beðið eftir þeirri síðustu. 

Þrjár hryssur frá okkur hafa verið í þjálfun í Pulu og voru þær teknar út um daginn, leit vel út og hver annarri fallegri en svo kemur í ljós með vorinu hverjar fara í dóm. Púki fór svo á reiðhallarsýningu á Hellu um daginn og Kórall í bæinn ásamt þjálfara sínum honum Jóa, þeim gekk báðum vel og verður Púki hjá okkur í sumar og Kórall í Pulu og taka þar á móti hryssum.

Stóðinu var smalað heim síðustu helgi og tekin tvö hestfolöld undan þeir Krapi og Kalsi. Krapi er undan Sigurrós frá Lækjarbotnum og Kjarna frá Þjóðólfshaga, Kalsi er undan Sóley og Púka frá Lækjarbotnum, það hefur verið tekin sú ákvörðun að halda þeim báðum gröðum og sjá hvernig þeir þroskast með aldrinum.