Nína, Lísa, Anna, Katrín og Silla fóru um daginn með þeim Sveini Hallgrímssyni og Einari Þorsteinssyni  að skoða feldfé hjá þeim Guðna í Melhól og Kristbjörgu á Þykkvabæjarklaustri. Sveinn kenndi þeim réttu handtökin við dóm á svona skepnum og keypti Lísa nokkrar af hjónunum í Bakkakoti sem Kristbjörg mun fóstra fyrir hana. Þetta þótti merkisdagur því Landinn kom á staðinn og tók þetta allt saman upp.

Svo var það föngulegur hópur sem yfirgaf landið og heimsóttu skosku hálöndin en Sigga systir Nonna og maðurinn hennar Jan höfðu skipulagt vikuferð fyrir hópinn. Það voru Anna, Eiður, Lísa, Óli, Holla, Nonni og Botna hjónin sem fóru út í þessa ferð, flogið til Edinborgar og þaðan var keyrt á milli hinna ýmsu staða, meðal annars voru skoðuð lífræn bú með ær, kjúklinga og svín, whisky verksmiðja, handverksfólk með ull og safnara sem söfnuðu meðal annars David Brown traktorum. Fengu að prufa þjóðarrétt skota en hann er ekki ósvipaður blóðmör sem við þekkjum til. Vel heppnuð ferð í alla staða og allir kátir glaðir þegar heim var komið.

Ásetningslömbin eru rúin og komin á gjöf, þetta eru um 40 lömb sem voru sett á, einn hyrndur lambhrútur og svo var farið til Huldu og Tyrfings og verslað sér 2 kollótta lambhrúta. Við erum nokkuð sátt með hópinn okkar og eru þau öll farin að fóðrast vel. Tvö forystulömb eru í hópnum, þau Surtla og Blesi, Surtla er strax farin að skammast í hinum lömbunum og stjórna hópnum en hrúturinn er aðeins hógværari í sínum hóp.

Við höfum aðeins verið að taka á móti gestum sem koma að skoða fiskverkunina og fiskeldið hjá okkur, fengum stórann hóp um daginn allstaðar að úr heiminum t.d. frá Sardeníu og Kýpur, þessi hópur var á vegum FSu en þar er verkefni í gangi um sjálfbærni eyríkja, fyrr um daginn hafði hópurinn heimsótt Friðheima og eftir heimsóknina hjá okkur fóru flestir á hestbak hjá Anítu í Austvaðsholti, sumir hverjir í fyrsta sinn á ævinni.  Á myndinni sést hluti af hópnum sem kom til okkar en við höfum boðið hópunum upp á kaffi og smakk á reyktu, gröfnu og bleikjusalati.

Hin árlega litasýning var haldin að Árbæjarhjáleigu og komu margir með litskrúðugt og fallegt fé á sýninguna. Uppboðslambið gaf Regúla í Austvaðsholti og fór hún á 35 þúsund en það var Sigurjón í Fellsmúla sem festi kaup á henni en sú upphæð rennur í kaup á verðlaunum, hljóðkerfi og auglýsingu fyrir félagið. Í einni stíunni setti fólk lömb sem þóttu athyglisverð fyrir litinn, þau eru númeruð og svo kýs fólk það lamb sem þykir standa uppúr, í ár vann Skarð athyglisverðasta litinn en það var gimbur sem sést á myndinni, hvít með fáeinum brúnum skellum á haus og löppum. Einnig voru veitt verðlaun fyrir fallegustu gimbrina, fallegasta hrútinn, fallegustu ána með afkvæmum og fallegasta hrútinn með afkvæmum.

Fórum í réttir á fimmtudaginn síðastliðinn, heimtum nærri allt okkar fé, vantar aðeins 2 ær og 1 lamb. Lömbin voru bara ágæt sem komu heim en við settum alla hrúta sem voru sæmilega stórir og allar einlembings gimbrar í sláturhúsið úr réttunum, keyrðum svo restina heim. Veðrið var nú ekkert að leika við okkur þennann daginn en það rigndi hressilega milli þess sem sólin skein.