Nú er búið að leggja lokahönd á hesthúsið hjá okkur, 6 nýjar eins hesta stíur komnar svo nú telur húsið 10 stíur. Siggi sá um mest alla vinnuna með aðstoð frá góðu fólki og innréttingarnar komu frá Skipanesi (hróar.ehf).  Í vetur munu vera 9 hestar á húsi, flest allt fulltamndir reiðhestar en yngsti hesturinn verður Þengill 3 vetra rauður hestur undan Kóral og Líf frá Lækjarbotnum. Þórunn hefur verið í Reiðmanninum frá því í haust, kennslan fer fram á Selfossi undir stjórn Þórdísar Erlu Gunnarsdóttur og eru nemendurnir 12 talsins.

Mæðgurnar fóru til Berlín ásamt Hildi systur Nínu og hittu Margréti dóttur Hildar þar en Margrét býr og starfar í Þýskalandi. Þar hittu þær auðvitað á útsölur og eyddu þrem dögum í búðarráp og skemmtun, síðasta daginn tóku þær smá rölt um Berlín og sáu það helsta svo hægt væri að segja frá einhverju markverðu þegar heim var komið. Þessa sömu helgi fóru Tóti og Siggi á þorrablót landmanna og fór það vel fram eins og oft áður, góð skemmtiatrið og ágætur matur.                                      

Þórhallur festi kaup á bíl um daginn, hann kom til landsins frá Bandaríkjunum fyrir viku síðan og í gær sóttu feðgarnir bílinn og fengu að koma honum inn hjá Nonna. Bíllinn er af gerðinni Chevrolet c10 árgerð 1965, bíllinn er með nýuppgerðann v8 mótor og skiptingu. Nokkuð heillegt boddý, Tóti er með mikil plön fyrir þennann bíl en kemur í ljós með tímanum hvað verður. Tóti hefur miklar bíladellu og hefur keypt 5 bíla á þessu ári og selt 8 stykki, nýjustu bílarnir eru Mitsubishi EVO9 árgerð 2007 og svo Hilux 2,4 TD, 44 tommu breyttur árgerð 1990. Spurning hvað þessir bílar endast lengi í höndunum á Tóta og hvað verði komið á hlaðið á nýju ári.